1) “Samuêl ! Samuêl! Niciti, prepare i ûfs colorâts pai tiei amîs !” a vosin lis sisilis svolant cuasi a tocjâ i ramaçs dal pierçolâr. “Tu âs di moviti che doman al è il dì di Pasche!”

2) Inte fatorie, la clocje e à lassât i ûfs de sô covade cence custodie, parcè che e je lade a disdurîsi lis gjambis, ma cuant che e torne dongje e no ju cjate, e berghele:

“Samuêl, Samuêl, ce fâstu, chei ûfs a son miei!”

“Scuse…” al rispuint dut confusionât Samuêl. “Jo… no savevi… o provarai a domandâ a la Mame Dindie”.

3) “No! La mê femine no je a cjase!” al dîs il dindi deventant prime dut ros e po dopo colôr viole e celest. “E je lade a fâ la spese… o soi jo che o covi i ûfs fintremai che jê no torne. Prove a domandâ a la Mame Raze.”

4) “Samuêl, Samuêl, viôt i miei picinins, viôt ce biei che a son! A son nassûts cumò denant e a son za pronts a lâ te aghe! Parcè no vegnistu ancje tu a zuiâ cun nô?”  “No! No ai timp, scuse, o stoi cirint ûfs par colorâju, o ai di regalâju ai miei amîs doman che e je Pasche. O provarai a domandâ a Mame Ocje.”

5)”Mame Ocje e à fat indigjestion di polente!” i spieghe Tristan il Bassot, “al è miôr no disturbâle, il Çus Savi i à ordenât di stâ trê dîs cence mangjâ e di stâ polsade intal jet. Prove a domandâ a Tonine il Crot o a Mame Copasse”.

6) “Samuêl, Samuêl! Tu sês propit un stupidut, un gnognul!” e rît Tonine. “ No tu sâs che i ûfs di crot a son picinins come il cjâf da la gusiele?” Ancje Mame Copasse si met a ridi: “ Ce fasaressistu tu cui miei ûfs che a son grancj come une nolute?”

7) “Samuêl, Samuêl… tu ti meretaressis une tiradute di orelis!” al bruntule Rigo il Cjaval. “ No tu sâs che i cjavai no fasin i ûfs?”. “E nancje lis cjavrutis no fasin i ûfs !” si rabie Gjudite la Cjavrute. “Prove a domandâ a Mame Colombe”.

8) “Mandi, Mame Colombe. O viôt che ancje i tiei picinins a son nassûts! E alore parcè sêstu preocupade?” “O soi in pinsîs  par vie che no pues puartâ l’ulîf da la pâs ai nestris amîs de fatorie: o scuen stâ achì, a tignî di voli la mê niade.

9)No stâ dâti pinsîr par chê robe chi” al rispuint Samuêl. “Se tu vûs o larai jo a puartâ l’ulîf da la pâs, tant, mi sa che no cjati ûfs di colorâ di nissune bande! O tacarai propit di Rigo il Cjaval e di Gjudite la Cjavrute che si son rabiâts cun me. Cussì o fasarìn la pâs”.

10) “No mi impensavi di vê tancj amîs” al dîs dut content Samuêl a la fin dal so lunc zîr. Mi son restâts dome doi ramaçs: un par Milli la Vacje e un par me.

11) “Gracie, Samuêl” e dîs Milli “Jentre, jentre! Ancje jo o ai di dâti une robe, un regâl de bande di ducj i amîs de fatorie”.

12) “Ooooh! Ce biel ûf! E ce grant! Doman cun chest ûf chi o fasarìn fieste di Pasche ducj insiemi” al dîs dut content Samuêl. “E o varìn cjocolate par ducj !”