Nô fruts des classis cuintis de scuele  primarie di Paulêt vie pal an o vin fevelât di animâi.

O vin scoltât storiis, inventadis rimarolis, o vin let e imparât robis gnovis in particolâr su besteutis che o podìn viodi intal nestri teritori.
Bestiis utilis come il riç o la âf o ben fastidiosis tant che  la pudiese; 
animâi bogns di fâ robis un tic magjichis come il ragn cu la sô tele o la pavee cu lis sôs trasformazions;

Animâi che inte storie si son viodûts tacâ intôr magagnis o cualitâts dai oms, cussì che a son passâts simpri par triscj, tant che il lôf, o furps come la bolp,
svelts tant che il jeur o ben spaurôs  tant che il cunin
(ancje se ducj i doi a son brâfs tal cori!),
stupits come la ocje o sfadiâts tant che la ciale. 

Ve ca cualchidune des rimis che o vin inventât:

O soi une furmiute di Seorgnan
e o mangji fruçons di pan dut l’an

O soi una pudiese di Ravose
e o cîr la morose!

Mi clami Ese e o soi une pudiese.
L’artropot al à il cuarp sfodrât di chitine.
O ai une arme segret.
O soi une pudiese buzarone.
O sai che o soi puçolente.
No ti dîs dulà, ma o scuint une glandule particolâr.
Se tu mi tocjis o mandi fûr la peste fetente.
O pues svolâ parcè che o ai lis alis.
Cuant che o svoli o fâs un grum di confusion.
Puare mai me se o coli intune tele di ragn.
Cuant che o sint frêt o voi a parâmi intal cjalt.

Graciis di cûr ae none di Caterina che ancje chest an nus a regalât un tic dal so timp e de sô pazience par fevelâ furlan cun nô.