Blog Archives
Lavôrs a man
Il martars dopomisdì o vin fat un laboratori cu la mestre Emanuela Riccioni: o vin doprât la arzile!
O vin batût la arzile, le vin tirade cuntun mescul, i vin dât la forme che o volevin nô e daspò le vin cuete intal fôr. (Chiara, Marianna, Silvia)
Un lavôr par la pâs
Pensant a la pâs, o vin fat une colombe par decorâ la scuele e une par puartâle a cjase.
Dopo cuete, le vin colorade cui acuarei a pueste.
Un difusôr di incens
Daspò o vin fat un puarte incens cu la arzile.
Jo lu ai decorât cun dôs tartarughis su la rive dal mâr. (Marianna)
Jo lu ai decorât cu lis tartarughis e une stele marine su la splaze. (Silvia)
Jo lu ai decorât cun dôs tartarughis tal mieҫ dal mâr. (Chiara)
Fieste de mame
Pe fieste de mame o vin fat un pendacul doprant la arzile.
Ju vin fats di tantis formis: di fantasie, taront, come une gote o une fuee.
Tal mieҫ o vin metût une tessare di mosaic di ce colôr che o volevin nô.
Daspò o vin cuet i pendacui tal for de ceramiche.
La tessare cul calôr si e disfate e cussì e a dât un biel colôr.
Fieste par nestri pari
Par la fieste dal papà o vin fat un puarte clâfs di stofe, cusît cun fîl e gusele.
O vin fat un gjat o un cûr cemût che o volevin nô.
O vin scrit une poesie in furlan e intune sachete o vin metût tantis clâfs di cjarte
cun scrit a ce che coventavin, par esempli “par lâ ator in bici insiemi”.
Si podeve sielzi la forme che o volevin.
Jo o ai decidût il gjat neri che al someave al gno. (Chiara)
Jo o ai decidût di fâ un cûr ros e sore un curut rose. (Marianna)
Jo o ai fat un gjat (Silvia)
La storie di Gotute
Chest al è il lavôr di une mestre dal Istitût Comprensîf di Faedis che e insegne la lenghe furlane ancje a Ipplis, tal Istitût Comprensîf di Premariâs. Al è stât realizât insiemi cui frutins de Scuele de Infanzie.
La mestre è à contât al grup di fruts e frutis la storie di Gotute judantsi cu lis imagjins dal libri “Goccia Lina e il ciclo dell’acqua” intun lavôr di siencis finalizât a fâ cognossi il cicli de aghe e ancje a svilupâ fantasie e creativitât.
Scoltait cheste biele conte:
Bidin e Bidine
Savêso la storie di Bidin e Bidine? Noaltris fruts de sezion B de Scuele de Infanzie di Paulêt le savìn benon!
Bidin e Bidine a lavin a nolis cul zei.
Bidin al tirave jù lis nolis e lis mangjave,
Bidine lis meteve tal zei.
Jemplât il zei, la Bidine a torne cjase e Bidin si ferme li.
Bidine: Bidin anin a cjase, Bidin anin achì…
Bidin: No jo, no jo, no jo che no, no ven!
Bidine: Cjan, muart Bidin, che nol vûl vignî achì…
Cjan: No jo, no jo, no jo che no lu fâs!
Bidine: Baston, bastone il cjan, che nol vûl muardi Bidin…
Baston: No jo, no jo, no jo che no lu fâs!
Bidine: Fûc, bruse il baston, che nol vûl legnà il cjan…
Fûc: No jo, no jo, no jo che no lu fâs!
Bidine: Aghe, stude il fûc, che nol vûl brusâ il baston…
Aghe: No jo, no jo, no jo che no lu fâs!
Bidine: Bo, bêf la aghe, che nol vûl studâ il fûc…
Bo: No jo, no jo, no jo che no lu fâs!
Bidine: Becjâr, spavente il bo, che nol vûl bevi la aghe…
Becjar: No jo, no jo, no jo che no lu fâs!
Bidine: Cuarde, lee il becjâr, che nol vûl spaventâ il bo…
Cuarde: No jo, no jo, no jo che no lu fâs!
Bidine: Surîe, rosêe la cuarde, che no vûl leâ il becjâr…
Surîe: No jo, no jo, no jo che no lu fâs!
Bidine: Gjat, mangje la surîe, che no vûl roseâ la cuarde…
Gjat: Sì jo, sì jo, sì jo che lu fâs!
E alore, il gjat al rive e al va a mangjâ la surîe,
la surîe, cuant che e viôt a vignȋ il gjat, e cȏr svelte a roseȃ la cuarde,
la cuarde, cuant che al viȏt a vignȋ la surȋe e cor svelte a leȃ il becjȃr,
il becjâr, cuant che al viôt a vignȋ la cuarde, al cȏr svelt a spaventȃ il bo,
il bo, cuant che al viȏt a vignȋ il becjȃr, al cor svelt a bevi l’aghe,
la aghe, cuant che e viȏt a vignȋ il bo, e cȏr svelte a studȃ il fȗc,
il fȗc, cuant che al viôt a vignî la aghe, al côr svelt a brusâ il baston,
il baston, cuant che al viôt a vignî il fûc, al côr svelt a bastonâ il cjan,
il cjan, cuant che al viôt a vignî il baston, al côr svelt a muardi Bidin
e Bidin cuant che al viôt a rivâ il cjan, al côr svelt a cjase.
A cjase lu spete Bidine che i da une bussade….
Cussì e finìs la storie di Bidin e Bidine!
Scoltâ, comprendi e comunicâ par furlan!
Nô fruts di prime de scuele di Paulêt o vin imparât a scoltâ la mestre Cristina par comprendi un codiç linguistic diviers dal talian e cirî un pôc a la volte di comunicâ par furlan inte semplice vite di ogni dì.
CE TIMP ISÂL VUÊ? O vin fat la osservazion dal timp e viodût che al cambiave. 
Ce biel zirâ la ruede ! 
O vin scoltât la storie de mestre e dissegnât.
Ve ca i omenuts dal ti
mp…
Ce ligrie sperimentâ cualchi materiâl gnûf! 
O vin imparât fasint lis azions dai omenuts…. Zuiât cu lis peraulis 
Ripetût frasis e filastrocjis…
O vin scoltât la mestre contâ flabis, fasint i mots e cirût di capî e interagjî par colaborâ tal zûc.
O vin inventât insiemi une flabe e costruît i i personaçs. 
Ce biel piturâ cul dêt! 
O vin dissegnât e capît lis secuencis. 
O vin zuiât e animât la nestre flabe. 
E par finì… o vin un biel librut di puartâ a cjase! 
Lis flabis di Fedri
Vie pal an scolastic la mestre e à presentât ae classe tierce di Osôf diviersis flabis di Fedri. I arlêfs si son divertîts in prin a rapresentâ lis storiis, e po dopo a lei in lenghe furlane lis contis. Cumò us contìn une…
La bolp e la cicogne
La bolp e la cicogne une volte a jerin buinis amiis e si viodevin dispès. La bolp però, simpri stade une vore birbone, une dì e decidè di invidâle a gustâ e di fâi un biel scherç. E cjolè dôs scudielis e e de chê mancul fonde a la cicogne che, vint un biel bec lunc, cuant che e finì di gustâ e veve plui fan di prime.
“Ti isal plasût?”, i domandà la bolp fasint bocje di ridi.
“Cemut no po, comari bolp”, i disè la cicogne che no jere tant credençone. “
Par chest ti torni vulintîr la cortesie, tu mi fasis une vore contente se la setemane che e ven tu vegnis tu a gustà là di me”.
E passà une setemane, cuant che la bolp si presentà a cjase de cicogne, cheste i servì il gustâ intun vâs dal cuel lunc e stret e dut ce che podè fâ la bolp al fo di lecâ l’ôr dal vâs!
Cui che le fâs che le spieti!
I dîs de setemane cui nanui di Blancjenêf
Nô fruts di prime di Osôf o vin imparât i dîs de setemane in lenghe furlane.
Lunis: al è il plui piçul, si clame Cucciolo, al è cetant ninin.
Martars: cul rafredôr, Eolo al starnude a dutis lis oris. Etcì,etcì,etcì…
Miercus: al è grassut, si clame Gongolo, il galup.
Joibe: ce grant savi, si clame Dotto, nol dismentee nuie.
Vinars: al è un nanul mumiot, si clame Brontolo il bruntulon.
Sabide: al è Mammolo al à une cjalade dolce.
Domenie: ce ronceâ! Al è Pisolo che al va a polsâ.
Âstu pôre de strie?
Âstu pôre de strie? …. Un freghenin!
Cun cheste domande al è tacât il nestri percors.
Nô fruts di cuarte de scuele di Paulêt o vin zuiât, animât, balât, inventât, dissegnât….
O vin scoltât la mestre contâ e lei lis storiis e capît che une volte la int furlane e veve pôre des striis.
Cumò nessun di nô al à plui pôre des striis.
Nô a scuele lavorant o vin ridût … Cussì o vin imparât insiemi a cjacarâ, a lei, a scrivi dialics, tescj regolatîfs, tescj descritîfs, tescj naratîfs e poetics.
Ce fasie la strie?
O sin striis perfetis… Ce biel stravistîsi e svolâ su la scove! Ce ligrie!
Il bal de scove de strie. Ce ridi!
Il bevarin magjic de strie: ce nus covential? Metìn dongje dal dissen lis peraulis.
Ce magjie! La formule magjiche e funzione!
Mm… Bombons di viers e lisiertis par ducj!
Dulà vaie la strie? Peçots, la boutique de strie: dulà che la sartore i fâs une cotule gnove
Cemût fasìno la nestre strie? Ce materiâi e imprescj nus coventino?
La mari di Giada, come une sartore, nus jude a ingrispâ lis cotulis.
Ve ca la nestre poesie, le vin animade par imparâle ben a memorie.
Musis matis
Creâ inte scuele de infanzie!
Metìn insieme la nestre fantasie par fâ nassî gnûfs amîs. Musis matis che nus fasin compagnie.
Une ativitât artistiche che e fâs lavorâ in grup ancje i frutins plui piçui.
MATERIÂL
- un sfuei blanc par ogni frut
- penarei
- fantasie
ORGANIZAZION
I fruts a son sentâts ator ator di une taule.
ATIVITÂT
La mestre e da ai fruts un sfuei parom.
Al “VIE!” ogni frut al dissegne il taront di une muse, in ce maniere che al vûl.
Cuant che ducj a ân finît a passin il lôr sfuei al compagn a diestre.
Cumò ogni frut al pues dissegna i vôi su la muse che il compagn i à dât.
Cuant che ducj a àn finît a passin, ancjemò une volte, il lôr sfuei al compagn a diestre.
Cussì si va indenant, dissegnant vôi, nâs, bocje, orelis, cjavei…
Ae fin si podarà dâ un non a lis musis matis, e magari… contâ ancje la lôr storie!
La maraveose storie di une floridure blancje
Intal prât e je nassude une floridure blancje, cence un colôr ni un odôr… ma une pavee vignude di lontan i darà mût di cognossi la bielece di robis, di odôrs e di colôrs, e la sô vite e cambiarà…
Intal mieç di un biel prât florît e colorât e je nassûde une floridure pardabon stranie, cence un colôr ni un odôr…
Blancje come…. la nêf che e cole lizere su la piche di une mont… blancje come il lat dentri di une scudiele…. blancje come la sbrume di une onde dal mâr….
E steve li cjalant dut il biel ator di sè. E sintive il nulî di ducj i flôrs ator di jê, e viodeve une schirie di animaluts che ducj intrigâts si movevin intal prât e intal cîl seren…
(chi i fruts mi contin ce che si môf intal ambient dal prât)
moscjis,âfs, zupets, furmiis di ogni sorte, gjespis e parfin cualchi mariute…
La flôr po dopo di sei maraveade, un pôc avilide e jere restade, par vie che a nissun dulintôr i interessave di poiâsi sore di jê, nissun le considerave. Al è biel stâ un pôc di bessôi, ma po e ven la malinconie a sintisi bandonâts.
Dibot e rive sfladant une pavee dute colorade che si poie par câs propit sore di jê. E tire il flât a grops, parcè che e à svolât ator par dut il borc tra cjasis, orts e stradis.
E sint la flôr blancje a sustâ e i dîs:
PAVEE: “Ce âstu che tu sês cussì avilide?”
FLÔR: “Ducj mi àn lassade di bessole!”
PAVEE: “Forsit parcè che no tu âs ni un colôr ni un odôr!”
FLÔR: “…e ce sono i colôrs e i odôrs?”
La pavee e scomence a contâ dut ce che e à imparât lant pal mont…
e tache dal colôr ROS….
ROS, come un pomodoro biel madûr intal ort, ROSSE come une cjariese suntun cjariesâr,….
(ogni arlêf, al conte par furlan disint cualchi robe che à chel colôr)
La flôr come par magjie e piture di chel colôr un dai siei pics, forsit par visâsi di chel che la pavee i sta insegnant e po dopo i conte dal colôr VERDULIN e dal ZÂL….
Planc a planc la flôr e devente simpri plui biele e colorade e, di odôrs a ‘nd à propit une schiriade!
Intal cîl e rive di lontan une niule di ploie che iluminade di un rai di soreli e fâs comparî la bielece di un straordenari ARC DI SANT MARC.
La flôr cumò e je legre e in gjonde.
FLÔR: “Ce meracul, intal cîl e je une maravee biele come me!”
(Cheste conte nus insegne a capî che a scoltâ si imparin cetantis robis e che a stâ di bessôi no si impare propit nuie!)