Browsing category
Scuola dell Infanzia Taverna
La cjase di Pieri il Soreli
Chest an i grancj de sezion B de scuele de infanzie “Taverna” a àn aprofondît lis cognossincis de lenghe furlane frontant l’argoment dal timp meteorologjic.
Il percors al è scomençât cu la presentazion di Pieri il Soreli che al vîf intune cjase 
speciâl: il cîl.
Cussì ducj i fenomens meteorologjics che o podìn cjatâ a son stâts presentâts ai fruts come amîs di Pieri, cun tancj moments di piçulis dramatizazions.
O vin cussì fevelât di Jacum il nûl e di tancj altris: la nêf, l’aiar, la ploie, la tampieste, il burlaç, i lamps, i tons, l’arc di Sant Marc.
I fruts, si son divertîts une vore, a son stadis creadis tantis situazions, ancje di zûc, che ju àn incuriosîts e che ur àn fat capî e rifleti, cun osservazions libaris e vuidadis su lis diviersis manifestazions dal timp.
PIERI IL SORELI
PIERI IL SORELI AL STA INTAL CÎL
OGNI MATINE SI SVEE E SI JEVE SÙ.
A DUT IL MONT LUI AL PUARTE LA LÛS
FIN CHE A SERE LUI AL VA A DURMÎ.
PIERI IL SORELI AL È UN GRANT AMÌ
PIERI IL SORELI AL È UN GRANT AMÌ.
LA TAMPIESTE
TICHE, TOCHE, TICHE, TOCHE
TICHE, TOCHE, TICHE, TOCHE
BALUTIS GLAÇADIS
CHE A VEGNIN JÙ DAL CÎL
CHE A VAN DI CA E DI LÀ
E A JEMPLIN IL CURTÎL.
TICHE, TOCHE, TICHE, TOCHE
TICHE, TOCHE, TICHE, TOCHE
Il lôf e i trê purcituts
O sin i frutins de sezion D de scuele de infanzie “Taverna”. Chest an o vin scoltât e dissegnât la storiute dal “Lôf e i trê purcituts”, che nus è plasude une vore.
O vin ancje imparât cjançons, filastrocjis e bai.
AL JERE UNE VOLTE UN LÔF PLEN DI FAM 
CHE NOL MANGJAVE DI PLUI DI UN AN
LUI NOL VOLEVE FORMADI E LIDRIC
DOME I PLASEVE LA CJAR DI PURCIT
E DOPO A JERIN TRÊ PURCITUTS
COLÔR DI ROSE E PASSUDUTS
E LÔR NO VEVIN PÔRE DAL LÔF
PARCÈ CHE A JERIN CETANT CORAGJÔS….
LA CJASE E JE FUARTE, PROPIT BEN FATE
IL LÔF AL PENSE: “O JENTRI PE NAPE”
E CUSSÌ AL COLE, CHEL PUAR BIÂT
PROPIT SUL FÛC CHE AL JERE PIÂT!
