Nô fruts di tierce de scuele primarie di Dalés,
dopo une jessude sul Palâr, o vin volût fâ un mosaic cui claputs;
cheste e je la nestre ativitât!
Browsing category
Ic Trasaghis
Lis flabis di Fedri
Vie pal an scolastic la mestre e à presentât ae classe tierce di Osôf diviersis flabis di Fedri. I arlêfs si son divertîts in prin a rapresentâ lis storiis, e po dopo a lei in lenghe furlane lis contis. Cumò us contìn une…
La bolp e la cicogne
La bolp e la cicogne une volte a jerin buinis amiis e si viodevin dispès. La bolp però, simpri stade une vore birbone, une dì e decidè di invidâle a gustâ e di fâi un biel scherç. E cjolè dôs scudielis e e de chê mancul fonde a la cicogne che, vint un biel bec lunc, cuant che e finì di gustâ e veve plui fan di prime.
“Ti isal plasût?”, i domandà la bolp fasint bocje di ridi.
“Cemut no po, comari bolp”, i disè la cicogne che no jere tant credençone. “
Par chest ti torni vulintîr la cortesie, tu mi fasis une vore contente se la setemane che e ven tu vegnis tu a gustà là di me”.
E passà une setemane, cuant che la bolp si presentà a cjase de cicogne, cheste i servì il gustâ intun vâs dal cuel lunc e stret e dut ce che podè fâ la bolp al fo di lecâ l’ôr dal vâs!
Cui che le fâs che le spieti!
I dîs de setemane cui nanui di Blancjenêf
Nô fruts di prime di Osôf o vin imparât i dîs de setemane in lenghe furlane.
Lunis: al è il plui piçul, si clame Cucciolo, al è cetant ninin.
Martars: cul rafredôr, Eolo al starnude a dutis lis oris. Etcì,etcì,etcì…
Miercus: al è grassut, si clame Gongolo, il galup.
Joibe: ce grant savi, si clame Dotto, nol dismentee nuie.
Vinars: al è un nanul mumiot, si clame Brontolo il bruntulon.
Sabide: al è Mammolo al à une cjalade dolce.
Domenie: ce ronceâ! Al è Pisolo che al va a polsâ.
Il steme di classe
I fruts di cuarte de scuele Primarie di Vençon a àn lavorât sul steme. Chest percors si e svilupât partint de presentazion individuâl da la lôr cjase. Po dopo ognidun al à contât alc de sô famee. Di li i fruts a àn ideât il propri steme, chel che plui ju rapresente.
Subit dopo ur è stât proponût di pensâ e realizâ un steme di classe. Dopo vê lavorât in grup e a cubiis, i fruts a àn contât ai compagns lis propuestis pe realizazion dal steme di classe. Ducj a son stâts scoltâts e a àn votât lis propuestis dai grups. 
Ae fin a àn realizât chest lavôr: une biele mongolfiere, colorade cui colors dal Arc di Sant Marc, la lôr foto incolade suntune mariutine che a sei di bon auspîç, la foto di grup che e rapresente la union de classe. Dut chest lavôr al è il risultât di discussions e acuardis cjapâts insiemi.
Cheste modalitât di confrontâsi ai fruts e je plasude un grum.
Ae fin chest “Steme di classe” ju podarà compagnâ par un biel toc di strade che a varan di fâ insiemi ancjemò par un pôc. E cheste biele mongolfiere ju puartarà lontan…..
“Il Camarin”: une gnove buteghe a Vasinis”
Un percors di economie aziendâl te scuele de infanzie!!!
O vês di savê che dopo tancj agns tal paîs di Vasinis, Cinzia, la mame di Cesare, un frutin che o vin a scuele, e à viert une biele butegute di alimentârs che si clame “Il camarin”.
Lis mestris dal asîl, dopo sei stadis a Regjio Emilie a formâsi tal Centri “Loris Malaguzzi” a àn pensât ben di valorizâ alc dal teritori e cussì al è nassût chest percors…
O vin intervistât i nonos e la int dal paîs par savê ce buteghis che e jerin une volte e o vin realizât un librut.
Dopo o sin lâts a pît a visitâ la buteghe. O vin domandât e Cinzia cemût che lis robis a rivin, cui che al ven a comprâ, c
e che a comprin, o vin viodût che e je une casse dulà che si tegnin i beçs.
Po dopo, tornant a scuele, o vin ben pensât di costruî un negozi intun cjanton de aule. Ducj i frutins a àn puartât di cjase alc. Cinzia nus veve regalât des bielissimis borsis par fâ la spese fatis di materiâl riciclât. O vin fat i beçs e cussì o vin zuiât cui nestris amîs par un grum.
E cemût rivie la spese te nestre scuele?
Alore o vin intervistade la coghe che nus à contât de liste dal ordin e dal camion che al rive ogni setemane a puartâ la spese, lis pomis, la cjâr, il pes e il formadi…
Emozions e colôrs
Te Scuele de Infanzie di Vençon,
ogni colôr al pant une emozion!
Cjapant la idee di un lavôr fat inte scuele di Culugne, chest an o vin zuiât a fâ fente di…..
sei inrabiâts e invelegnâts, 
sei contents,
sei avilîts, spaurîts e parcè no ancje un pôc confusionâts, soredut cuant che no savìn contâ lis nestris emozions cu lis peraulis.
O vin zuiât cui struments musicâi, o vin mimadis lis musis des emozions,
lis vin pituradis sielzint un colôr par ognidune…..
Al è stât biel resonâ su lis nestris emozions e si sin un grum divertîts!
Ator ator par scuvierzi gnûfs amîs
Chest an i frutins de scuele di Avasinis si son vierts al teritori cun doi “zimulaments”.
Si son miscliçâts cui fruts de scuele di RESIE e po dopo cun chei de scuele di CULUGNE!
In chest percors a àn cognossût nuie di mancul che trê speciâi personaçs:
il TIRI-MIRI, ragnut di aghe une vore presint in chescj puescj dulintor;
la VEVËRIZA di Resie, che par furlan al è il sghirat;
MARI TIERE di Culugne, principesse che e ven de tiere e i plâs cetant il sunôr e la musiche.
I fruts, cun braure a àn podût dî di dulà che a vignivin, mostrâ e scuvierzi biei lûcs e soredut capî che JESSI FRUTS E VOLÊSI BEN AL È PAR DUCJ COMPAGN, AL CAMBIE DOME CEMUT CHE TU LU DISIS.
I frutins di Avasinis cu lis mestris a àn inventade la cjante dal Tiri-miri….
(su la musiche di “Wisky il ragnetto”)
IL RAGNUT TIRI-MIRI DI AVASINIS
Il Tiri-Miri al monte
e al va sù pe mont
la ploie lu bagne
e lui al cole jù,
jù, jù, jù.
Al torne il soreli
e lui al à fortune
e cu lis sôs talputis
al va ancjemò plui insù,
plui insù, plui insù, plui insù.
Ma sore la montute
al cjate une cjasute
cun dentri une sbilfute
che i prepare di mangjâ,
mangjâ, mangjâ, mangjâ.
E po cu la panze plene
al torne jù di corse
e al va inte scuelute
a zuiâ cun ducj i fruts,
i fruts, i fruts, i fruts.
Vite di cavalîr
Noaltris fruts di tierce de Scuele Primarie di Vençon o vin osservât a scuele la cressite e il svilup dai cavalîrs.
Intun libri animât (lapbook) o vin contât lis sôs trasformazions:
-
La pavee e fâs i ûfs su lis fueis dal morar.
-
Di ogni ûf e nas une ruie che cressint si clame cavalîr.
-
Cuant che al devente grant si siere dentri di une fodre che e pare la ruie intant de metamorfosi.
-
Cheste fodre si clame galete: e je fate di fîl di sede.
-
Dopo cuindis dîs la ruie e je deventade pavee, e sbuse la galete e e svole tal cîl.
O vin ancje costruît un cavalîr “mobil”!
Intal nestri lavôr e je stade clamade a partecipâ ancje la classe prime. I fruts di prime a jerin une vore contents di scuvierzi la vite dai cavalîrs!
Par lôr la mestre e à inventade une filastrocje par furlan, par judâju a no dismenteâ lis peraulis che o vin dopradis.
Filastrocje dal cavalîr
Jo o soi un cavalîr
e o voi a fâ un zîr
tra lis fueis dal morâr
che indi mangj un seglâr.
O soi blanc come il lat
e fra un pôc sarai bigat
fasarai une galete
di sede dute strete
ma po dopo maravee….
deventarai blancje pavee.
Intal cîl o svualarai
e dal alt us cjalarai.
Mans in vore
UNE MAN PITURADE DI ZÂL
UNE MAN PITURADE DI ROS
UNE SFREADE DI MANS E AL VEN FÛR…… NARANÇON
UNE MAN PITURADE DI BLU
UNE MAN PITURADE DI ZÂL
UNE SFREADE DI MANS E AL VEN FÛR……VERT
UNE MAN PITURADE DI ROS
UNE MAN PITURADE DI BLU
UNE SFREADE DI MANS E AL VEN FÛR…… VIOLE
UNE MAN PITURADE DI ROS
UNE MAN PITURADE DI BLU
UNE MAN PITURADE DI ZÂL
UNE SFREADE DI MANS E AL VEN FÛR…… MARON
Il zardin da lis rosis che a cjacarin.
La storie di Ailîs e lis sôs maraveis nus àn ispirât a costruî, come che il mèstri nus á insegnât, une rose tant bieline che… a tocjâle e somee che e cjacari a silabis!
