Author
Gjinastiche par furlan!
Noaltris fruts e frutis di seconde de scuele primarie di Faedis chest an o vin fat gjinastiche par furlan.
O vin imparât a saltâ cu la cuarde, a saltâ indenant, indaûr, a drete e a çampe.
O vin coret, imitât il cjaminâ di tancj animai e o vin fat ancje tancj zûcs.
O vin imparât a zuiâ di “Patate bolinte”, di “Pistolero”, “Bale gjambar”, “Il semafar” …
Si sin divertîts une vore!!!
I ciclis dal timp
La classe prime de scuele primarie di Atimis e à svilupât un percors CLIL leât al program di storie.
I fruts a àn fat esercizis , zûcs e schedis par imparâ i events ciclics dal timp…
come lis parts de zornade, i dîs de setemane, i mês dal an e lis stagjons.
Cui materiâi realizâts al è stât costruît un lapbook. Cjalait ce biel!!!
Ancje cheste cjançonute sui dîs de setemane ur à plasût cetant!
AN TAN TES
LUNIS LIS POMIS
MARTARS LIS SCARPIS
MIERCUS I SCUS DAI ÛFS
JOIBE BROADE
VINARS CINISE
SABIDE CJAMESE
FIESTE SI POLSE
FIESTE SI POLSE.
AN TAN TES
SINE MANE PES
AN TAN TES
SINE MANE PES
AN TAN TES
SINE MANE PUPULIS
AN TAN TES
AN TAN TES.
Siencis e ecologjie
Savêso che chest an o vin fat lezion di siencis par furlan?
Noaltris di seconde classe di Atimis o vin fevelât dai vivents e imparât il non da lis parts da lis plantis e a ce che e covente ogni part. O vin studiât i animâi e viodût ce che a mangjin, cemût che si movin e cemût che a fasin i piçui.
La lezion plui speciâl? Cuant che pe zornade de fieste de Tiere o vin messedât furlan, siencis, inglês e matematiche!
O sin partîts di un video par inglês che nus à spiegât ce che e je cheste fieste, par furlan o vin fevelât di ce che o podìn fâ par tignî di cont la Tiere e cuant che o vin dividût la robe tai bidons juscj, o vin imparât la division matematiche!
Fevelìn Furlan!
Mandi!
O sin la sezion C, poleçuts 🐥 de scuele de infanzie di Paulêt. O sin 27 fruts e frutis di doi agns e mieç/trê e vie pal an scolastic traviers il progjet “Fevelìn Furlan” o vin scuviert e imparât tancj cjants, filastrocjis e contis de tradizion furlane e ancje i concets topologjics e lis fiestis.
I dîs de setemane, lis parts dal nestri cuarp, i colôrs fondamentâi che a son ros, blu e zâl, ju vin imparâts doprant diviersis tecnichis e materiâi. 
Par fâ i cerclis o vin doprât i tubis di carton de cjarte igjieniche, par fâ lis liniis i rodui e ancje… pinei, colôrs a tempare, acuerei, lane….
O podês viodi i nestris lavôrs in chest piçul video:
Graciis a ducj e mandi!
I poleçuts 🐥 di Paulêt
Lis flabis di Fedri
Vie pal an scolastic la mestre e à presentât ae classe tierce di Osôf diviersis flabis di Fedri. I arlêfs si son divertîts in prin a rapresentâ lis storiis, e po dopo a lei in lenghe furlane lis contis. Cumò us contìn une…
La bolp e la cicogne
La bolp e la cicogne une volte a jerin buinis amiis e si viodevin dispès. La bolp però, simpri stade une vore birbone, une dì e decidè di invidâle a gustâ e di fâi un biel scherç. E cjolè dôs scudielis e e de chê mancul fonde a la cicogne che, vint un biel bec lunc, cuant che e finì di gustâ e veve plui fan di prime.
“Ti isal plasût?”, i domandà la bolp fasint bocje di ridi.
“Cemut no po, comari bolp”, i disè la cicogne che no jere tant credençone. “
Par chest ti torni vulintîr la cortesie, tu mi fasis une vore contente se la setemane che e ven tu vegnis tu a gustà là di me”.
E passà une setemane, cuant che la bolp si presentà a cjase de cicogne, cheste i servì il gustâ intun vâs dal cuel lunc e stret e dut ce che podè fâ la bolp al fo di lecâ l’ôr dal vâs!
Cui che le fâs che le spieti!
I dîs de setemane cui nanui di Blancjenêf
Nô fruts di prime di Osôf o vin imparât i dîs de setemane in lenghe furlane.
Lunis: al è il plui piçul, si clame Cucciolo, al è cetant ninin.
Martars: cul rafredôr, Eolo al starnude a dutis lis oris. Etcì,etcì,etcì…
Miercus: al è grassut, si clame Gongolo, il galup.
Joibe: ce grant savi, si clame Dotto, nol dismentee nuie.
Vinars: al è un nanul mumiot, si clame Brontolo il bruntulon.
Sabide: al è Mammolo al à une cjalade dolce.
Domenie: ce ronceâ! Al è Pisolo che al va a polsâ.
Cuadruts di Autun
Autun: vîts, cjastinis, fueis, glants, scus di panole…
In timp di Sierade, nô fruts di classe cuinte o vin doprât chescj elements naturâi par realizâ cuadruts di picjâ in cjase o regalâ a cui che o volìn ben.
Us plasino?
Mandi! 
La Mestre Laura e i fruts di classe cuinte de scuele primarie Division Alpine Julie di Udin
Didatiche a Distance
Chest an di scuele, par vie de emergjence sanitarie dal Covid19 lis lezions in presince si son dibot fermadis ae fin dal mês di Fevrâr.
A son stadis metudis in vore diviersis modalitâts par rivâ a cjase di noaltris fruts cuntune didatiche a distance.
Tal nestri Istitût si à decidût di preparâ pes classis paralelis compits di realtât che nus vignivin mandâts ogni setemane.
In chescj compits e je stade simpri presinte ancje une propueste di lenghe furlane cun ativitâts interdissiplinârs, in forme di laboratori e une vore bielis. Nô si sin divertîts tant a davuelzi lis propuestis che i mestris nus devin… tantis voltis a jerin ancje i link par podê viodi filmâts o scoltâ musichis e storiis par furlan.
Ve ca cualchi compit che nus vevin dât e i nestris lavôrs.
CLASSE PRIME
CLASSE SECONDE
CLASSE TIERCE
CLASSE CUINTE
Un biel lavôr fat a cjase!
Amîs di zûcs tal Grivò – conte in furlan
Pipinis di scus
Noaltris fruts di cuarte de scuele primarie Division Julie (Istitût Comprensîf 1 di Udin) o vin fat un lavôr che nus à plasût une vore. O vin doprât i scus e lis barbis des panolis!
Scus, scartos, … chest al è al non des fueis de blave.
Une volte masanade, la blave e devente “farine par fâ la polente”, un mangjâ tipic de nestre tiere furlane. Ma de blave une volte no si butave vie nuie e cul scus si costruive pipinis, zûcs o si jemplave i materàs par lâ a durmî.
Cussì cu la siore Roberta, une none pratiche di lavôrs fats a man, noaltris fruts di cuarte A e cuarte B e la mestre Laura, o vin imparât a doprâ lis nestris mans par costruî agnui di scus. O vin rivistût une balute di ‘polistirolo’, o vin tacât i cjavei fats cu lis barbis de blave, o vin fat il cuarp…
o vin tacât lis alis, o vin sierât la vite cuntune fasse colorade.
